РУСКИ КЕРЕСТУР – З нагоди 5. юния, Шветового дня защити животного штредку, дзеци з керестурского Оддзелєня „Цицибан” ПУ „Бамби” Здруженю женох „Байка” з Керестура вчера додзелєли свойо припознанє „Желєни лїсток”, а потим отримали и традицийни маскенбал.
Припознанє „Байка” достала за унапредзенє и чуванє животного штредку, цо роби и з вирабяньом предметох з рециклажного и природного материялу.
Вихователька Наташа Настасич „Желєни лїсток” придала предсидательки „Байки” Славици Катона, а на малей шветочносци у дзецинскей заградки були и заменїца предсидательки „Байки” Ксения Йованович и членїца Амалия Гарди.
Пред вечаром шицки воспитни ґрупи дзецох отримали маскенбал и таки поприберани ше прешпацирали през центер валалу, дзе их провадзели родичи и числени Керестурци.
З нагоди Шветового дня защити животного штредку на капури дзецинскей заградки виложени плакати з еколоґийнима поруками.