Безплатни шедзиска за 60-еро дзеци

автор сен
1.1k Опатрене

НОВИ САД – Прешлого тижня у Новим Садзе отворена перша Канцелария за дзецински авто-шедзиска у Сербиї, а єй улога будзе информовац о правилним хаснованю дзецинских шедзискох у превозкох, пишу нашо медиї.

През свойо активносци, Канцелария пожичи 60 шедзиска катеґориї 0+ (за дзеци до 13 килограми) самохраним родичом и родичом котри маю нїзки приманя, а шедзиска маю врациц кед их дзеци прерошню. За доставанє тих авто-шедзискох ше можу приявиц родичи котри вислухали преподаванє о правилним хаснованю шедзискох, маю авто, лєбо согласносц о хаснованю.

Едуковани совитнїки родичом на розполаганю пондзелками, стредами и пиятками од 17 до 19 годзин, и соботами од 11 до 13 годзин, а на сайту  мож пречитац шицки информациї о правилним хаснованю шедзискох за дзеци и условийох за доставанє безплатних шедзискох.

Канцелария за дзецински авто-шедзиска часц проєкту „Безпечносц ше учи пред шицкима крочаями – Канцелария за дзецински авто-шедзиска”, хтори витворює Центер за промоцию безпечносци у транспорту и компания НИС у рамикох програми „Заєднїци вєдно”.

ПОВЯЗАНИ ТЕКСТИ