НОВИ САД – На вчерайшей схадзки Скупштини АП Войводини прилапени ребаланс покраїнского буджету, хтори после вименкох будзе седем одсто менши од проєктованого, та тераз виноши 59,6 милиярди динари.
Покраїнски секретар за финансиї Зоран Радоман гварел же по тим буджету средства за капитални укладаня буду менши за 3,3 милиярди динари и додал же капитални проєкти нє буду загрожени, алє можебуц буду витворени нарок.
Предсидатель Покраїнскей влади Боян Пайтич наведол податки же, у складзе з Уставом, Република Сербия за тот рок АП Войводини длужна коло 40 милиярди динари и ище скоро 4,5 милиярди динари на основи приходох од порцийох од подприємствох. Вон потолковал же з 15 милиярдами у буджету Покраїна може шлєбодно розполагац, а остаток то трансфесни средства.
Ребаланс буджету прилапени зоз 66 гласами, а 18 посланїки були процив. Вименки нє потримали посланїки Сербскей напредней странки (СНС) и коалициї позбераней коло Социялистичней партиї Сербиї (СПС). Посланїки СНС гварели же покраїнска власц нє знала направиц буджет, бо то уж други ребаланс, после того у юлию.
Шеф посланїцкей ґрупи СНС у Скупштини АПВ Предраґ Матеїн критиковал Покраїнску владу и гварел же Влада Сербиї нє одвичательна за проблеми у войводянским буджету. Вон визначел и же Републична влада за три и пол рока перши раз Войводини уплацовала тельо пенєжу кельо предвидзене з Уставом.
Опрез посланїкох вчера були и вецей предлоги вименкох одлукох о програмох мирох потримовки за запровадзованє польопривредней политики за розвой валалу, потим за защиту, ушоренє и хаснованє польопривредней жеми.