РУСКИ КЕРЕСТУР – На вчерайшей схадзки Совиту Месней заєднїци (МЗ) Руски Керестур принєшена одлука о розписованю явней набавки малей вредносци прейґ хторей МЗ планує купиц пейц камери за надпатранє валалу. Як порадзене, єдна будзе поставена у центре Керестура, а по єдна на штирох виходох з места – спрам Кули, Крущичу, Косанчичу и Лалитю. За запровадзованє поступку явней набавки єдногласно вибрана комисия у хторей предсидатель Совиту Владимир Олеяр, та члени Иґор Фейди и Тихомир Фейди, а за їх заменїкох члени Совиту Иґор Джуня, Владимир Малацко и Янко Мудри. За надпатранє роботох меновани секретар МЗ Михайло Сабадош.
Дзешец присутни члени Совиту вчера бешедовали и о планох за ушорйованє валалу, дзе окреме визначени проблеми старих древох чийо коренї блїзко при драгох та дзвигаю и очкодую асфалтни драги, медзитим, нє дошло ше до одвиту хто задлужени за ришованє того проблему – чи ЯКП „Руском”, чи ЯП „Завод за вибудов” Кула. Бешедоване и о обнавяню дражкох у парку у центре валалу, алє пре финансиї, тот проєкт годзен буц реализовани аж нарок, оценєте на схадзки. Владимир Малацко предложел же би ше и до центру положело огласну таблу, яки уж постоя опрез Месней заєднїци и „Рускому“, о чим будзе порадзене познєйше.
Уж традицийне волонтерске чисценє базену будзе орґанизоване 19. юния, порадзене на схадзки, а хто жада помогнуц, може ше приявиц до Месней заєднїци.
Совит розпатрал и вимогу познатей керестурскей бодибилдерки Илони Зарубица же би МЗ финансийно помогла одход на значне змаганє у Французкей. Гоч у финансийним планє за тот рок нє предвидзени средства за таки намени, члени Совиту ше порадзели же винайду способ помогнуц Зарубицовей.
Розподзельованє средствох за обласц спорту у Руским Керестура тиж була єдна з темох дискусиї, дзе поведзене же шицки клуби Спортского дружтва „Русин” рочно зоз самодоприносу доставаю вєдно 667 000 динари, а члени Совиту оценєли же ше тот пенєж нє розподзелює як треба. Як поведзене, до спортох у хторих Керестурци успишни ше вельо менєй уклада як би требало, так же основана комисия, у хторей буду Иґор Фейди, Звонко Рац, Желько Ковач и Олена Папуґа, хтора будзе бешедовац з представителями клубох пре правилнєйше розподзельованє пенєжу зоз самодоприносу за спорт.