НОВИ САД – Покраїнски секретар за локалну самоуправу и медзиреґионалне сотруднїцтво Бранислав Буґарски сообщел пияток же Влада Сербиї одбила вимогу Покраїнскей влади же би до буджету АПВ уплацела 4,4 милиярди динари, же би ше могло финансовац компетенциї Войводини у складзе з Уставом. Остатнї дзень 2015. року Влада уплацела вецей як милиярду динари на рахунки 49 локалних самоуправох, дзе лєм коло дзешатину средствох войводянским општином.
Як ше наводзи у сообщеню, з 1,081 милиярди динари, лєм 133 милиони опредзелєни за општини на териториї Войводини.
Буґарски гварел же ше Покраїнска влада прето знова пита Влади Сербиї же „прецо гражданох Войводини третирує як гражданох другого шору и прецо гражданє Войводини менєй вредза у одношеню на гражданох других часцох Сербиї”.
Буґарски бешедовал и о плацох у локалних администрацийох, та винєсол же би одвичательносц за висину плацох службенїкох нє требала мац република, як то тераз, алє би то требало пренєсц на локални уровень.
З нагоди нового закона о плацох, хтори на явней управи, спозорел же Медзинародни монетарни фонд вимагал же би ше одредзело и огранїчело кельо ше будзе трошиц на заробки занятих у явней админитрациї.
– Медзитим, способ на хтори тот пенєж будзе подзелєни мала би буц ствар локалних политичних елитох и Беоґрад нє треба же би интересовало яка будзе плаца началнїка управи у даєдней општини – гварел Буґарски за Радио-телевизию Войводини.
Буґарски додал же ше наздава же зоз Законом о плацох у явним секторе будзе „виправена нєправда” хтора зоз зменшаньом плацох направена занятим у явним секторе, насампредз просвитаром, здравственим роботнїком и полициї.