„Васо Пикасо” пред числену публику

автор маф
1.5k Опатрене

РУСКИ КЕРЕСТУР – Вчера на Драмским мемориялє Петра Ризнича Дядї виведзена и остатня, штварта дзецинска представа, а наступели домашнї з фалатом „Васо Пикасо” Саву Шкобича, у режиї Ксениї Бодянец, у продукциї Драмского студия АРТ Дому култури Руски Керестур.

Велька сала Дому култури була преполна з публику, бо попри домашнїх, представу орґанизовано патрели и прейґ сто школяре з вецей наших местох, чий приход орґанизовал и финансовал Одбор за образованє Националного совиту Руснацох.

Представа школяром понука и моцне порученє же ше кажда спреводзка кеди-теди обиє о главу, а упечатлїво го пренєсли млади керестурски ґлумци, котри були сиґурни и убавени. У представи бавели Емилиян Няради, Ивана Планчак, Ана Костелник, Андрей Надь и Петрик Надь.

Режисерка Бодянцова обдумала и сценоґрафию, текст на руски язик преложел Владимир Бодянец, костими пририхтала Таня Орос, суфлерка була Сара Планчак, музични сотруднїк и тон-майстор Михайло Бодянец, а майстор шветла Сашо Палєнкаш.

Шицки учашнїки у представи од орґанизатора на дарунок достали кнїжку приповедкох и леґендох „Нєбо керестурске” Ирини Гарди Ковачевич, хтору им обезпечела НВУ „Руске слово”.

ПОВЯЗАНИ ТЕКСТИ