ВЕРБАС – На схадзки Скупштини општини Вербас, хтора отримана 17. новембра, з вименками и дополнєнями сновательного акту Културного центру, Вербас достал Городски музей.
Дотераз то була Музейна збирка, а город пошвидко достанє стаємну музейну постановку, хтора прикаже историю Вербасу од насельованя перших людзох на тоти простори.
Городски музей учишлєни до мрежи музейох Сербиї, а у орґанизацийним смислу є часц Културного центру Вербас. У стаємней постановки будзе презентована приповедка о Вербаше, од перших шлїдох чловека на тим просторе, та по конєц штреднього вику.
Як визначела руководителька Городского музею Весна Ґрґурович, финални пририхтованя за пременку статусу почали у априлу того року, кеди бул фахови надпатрунок з матичней установи – Музею Войводини. Теди достали инструкциї цо маю поробиц за законченє процесу за снованє Городского музею.
У Городским музею тераз заняти три кустоси, два историчаре и єден археолоґ, як и технїчар-документариста. Хибя кустос-етнолоґ и кустос за подобову збирку, алє предвидзене же тоти особи буду анґажовани по потреби.