БЕОҐРАД – Квалитет учебнїкох, пременки у розподзельованю безплатних учебнїкох, та доступносц учебнїкох на язикох националних меншинох, були теми явного слуханя о Нарису закона о учебнїкох, хторе стреду, 18. фебруара отримане у Скупштини Сербиї.
У розправи и даваню суґестийох участвовали народни посланїки, представителє секретарияту АП Войводини, Националного просвитного совиту, Заводу за учебнїки, представителє школох и совитох родичох, Союзу шлєпих, здруженя видавательох та националнх совитох националних меншинох.
Спред Националного совиту (НС) Руснацох на явним слуханю були предсидателька Одбору за образованє НС Мелания Римар и народна посланїца Олена Папуґа, котра и членїца Одбору за образованє Скупштини Сербиї и НС Руснацох.
У Нарису закона планована пременка у способе розподзельованя безплатних учебнїкох, хтори би мали доставац шицки социялно, односно материялно загрожени школяре, а нє лєм школяре перших штирох класох ОШ, як було дотераз.
Доступносц учебнїкох на язикох националних меншинох и учебнїкох за школярох з почежкосцами у розвою бул проблем хтори нє реґуловал терашнї Закон о учебнїкох и других наставних средствох, а з новим законом би вон мал буц ришени.
Министер просвити, науки и технолоґийного розвою Срдян Вербич гварел же ше, окрем тих проблемох, будзе робиц и на ришованю нєтранспарентносци у одобрйованю, корупциї у набавкох и дистрибуциї учебнїкох.