РУСКИ КЕРЕСТУР – На трецей порядней схадзки нового зволаня Националного совиту (НС) Руснацох всоботу, 20. децембра у Руским Керестуре, за подпредсидательох НС з векшину гласох вибрани Йовґен Мудри, котри источашнє будзе и заменїк предсидателя НС, Микола Шанта и Наташа Регак.
До Вивершного одбору (ВО) Совиту вибарни Желько Ковач, Йовґен Мудри, Микола Шанта, Наташа Регак и Наташа Макаї Мудрох, а за предсидателя ВО вибрани Желько Ковач, котри тоту роботу за тераз будзе окончовац з окремним волонтерским додатком.
Як потолковане, Ковач „замаржнє” свойо роботне место у Доме за старих у Кули и будзе на розполаганю за роботу у НС Руснацох, а накадзи буду пременєни законски предписаня, будзе и урядово заняти у Националним совиту як предсидатель ВО.
На трецей схадзки присуствовали шицки 19 члени НС, при концу схадзки 18, а спомнути подпредсидателє, заменїк предсидателя и Вивершни одбор вибрани з векшину гласох з явним гласаньом, на предкладанє предсидателя НС Славка Раца.
На самей схадзки за заменїка предсидателя, як и за предсидателя ВО, члени НС предложели и Миломира Шайтоша, а за членох ВО Олену Папуґа и Владимира Олеяра, алє спомнути нє достали потребну векшину гласох за вибор.