НОВИ САД – У Заводзе за културу войводянских Руснацох, вчера, 5. новембра, отворена вистава „Маски и жвератка” Милоша Лишанина Пифкия з Руского Керестура.
Присутних привитал директор Заводу мр Серґей Тамаш, а о маскох фахово бшедовал наш познати уметнїк Владо Няради.
– Кед маски спадню, аж теди видзиме прави твари їх ношительох. При роботох Милоша Лишанина маска мотив у його подобовим виразу. То його комуникация з материялом з хторого є направена, а то у основи природни материял – древо цо росло и було стварносц нашого окруженя и жалосна стварносц, яка остала после знїщованя природи. Милош ше намага нє нарушовац тот природни циклус, алє хаснує часци древа хтори нашол у природи и з минималну интервенцию твори нови имаґинативни швет – гварел, медзи иншим, Владо Няради отвераюци виставу.
Милош Лишанин Пифки народзени у Ужицу, попри твореня у подобовей уметносци пише и прозу и поезию, а од того року жиє у Руским Керестуре. Под час тогорочного Драмского мемориялу, у Руским Керестуре му була орґанизована вистава маскох.