НОВИ САД – Штварте Стретнуце предшколских дзецох з руских оддзелєньох у Руским Керестуре, Коцуре и Дюрдьове, хторе отримане у Керестуре, найважнєйша подїя за наших наймладших, о чим шведоча и фотоґрафиї на рамикох нового, майского числа „Заградки”.
Театралним представом за дзеци виведзеним на тогорочним Драмским мемориялє Петра Ризнича Дядї „Заградка” пошвецує цали други бок, а у тим чишлє обявює писнї и приповедки наших писательох – Михайла Ковача, Миколу Скубана, Василя Мудрия, Дюру Папгаргая, Агнети Бучко Папгаргаї, як и сербских писательох – Драґана Алексича, Сладяни Ристич и Зорици Баїн Дюканович.
У „Малей заградки” нова приповедка з гришочками и стихи о яблукох, а ту и найкрасши рисунки предшколских дзецох з Вербасу, Коцура, Нового Саду и Дюрдьова.
Од висткох з наших школох „Заградка” видвоює означованє 250-рочнїци образованя у Коцуре, а у рубрики „Вериш? Нє вериш?” мали читаче дознаю вецей о нєзвичайних библиотекох ширцом швета.