РУСКИ КЕРЕСТУР – У виданю Рускей матки (РМ) концом прешлого тижня вишло 24., а треце тогорочне число часопису РМ „Руснак”, як и скорейши, з финансийну потримовку Министерства култури и информованя Влади Републики Сербиї.
Нови „Руснак” приноши тексти о зашеданю Шветовей ради Русинох/Руснацох/Лемкох (РРЛ) у Горватскей, дзе одлучене же 14. Шветови конґрес РРЛ у тей жеми нарок будзе концом юния/початком юлия, о першим „Русин Филм Фесту” у Шидзе и його одгукох, Стретнуцу поетох, литературних и музичних творительох РМ у Керестуре (о Стретнуцу ма буц обявени и окремни додаток часопису), як и о означованю 20-рочнїци Руского КУД „Др Гавриїл Костельник” у Кули.
Попри звитох з вецей збуваньох по наших местох хтори орґанизовала РМ, у „Руснаку” и ширши тексти о Етно-клубу „Одняте од забуца” у Коцуре, о Новосадянови з Керестура Юлиянови Папови з нагоди 50-рочнїци його публицистичней роботи, як и о кнїжки „Керестурски приповедки” Терези Кубаньовей зоз Земплинскей Теплици у Словацкей. У „Поетским куцику” писнї Томислава Скубана, Вербащана котри жиє у Елемиру.
Як плановане, до конца рока ма буц обявене ище єдно тогорочне число глашнїку РМ „Руснак”.