НОВИ САД – Войводина порихтана през диялоґ участвовац у будуцих управяцких, та финансийних капацитетох у дальшим процесу прегваркох Републики Сербиї з Европску унию, гварел покраїнски секретар за медзиреґионане сотруднїцтво и локалну самоуправу Бранислав Буґарски на округлим столє з тему „Прегваряцки поглавя з угла АПВ – Реґионална политика и координация структурних инструментох”.
Буґарски оценєл же од шицких Поглавйох найзначнейше Поглавє 22, прето же дефинує системи хтори означа наиходзаци 10, лєбо 15 роки, а хтори з Бриселом будзе чажко меняц. Праве прето Покраїнска влада инсистує же би ше ю уключело до процесох прегваряня и уважело вибудов капацитетох хтори Войводина дотераз поробела.
– Ми робиме на вибудови капацитетох у кадрох, тримаме обуки за роботи хтори нас чекаю, робиме на вибудови финансийних капацитетох же би ше обезпечело средства за предфинансованє и софинансованє проєктох, як и на самей документациї – наведол Буґарски.
Окрем Буґарского, о Поглавю 22 бешедовали ище представителька Канцелариї за европски интеґрациї Ана Илич, Центру за реґионализем Александар Попов, Реґионалней розвойней аґенциї Осиєцко-бараньскей жупаниї Републики Горватскей Ґорана Стойкович, та професоре Йован Комшич и Веран Станчетич.
Округли стол орґанизовл Центер за реґионализем, у рамикох проєкту „Реґионални угел европских интеґрацийох – АП Войводина у процесу придружованя Сербиї до ЕУ”.