БЕОҐРАД – Просвитни роботнїки обчекую же им часц плаци хтора им вжата, будзе врацена през два награди, єдна по 7 500 динари.
Предсидатель Синдикату роботнїкох у просвити Сербиї Слободан Брайкович гварел же би през два награди – новорочну и видовданску – просвитни роботнїки могли достац коло 15 000 динари и з тим би ше закончело штрайк хтори тирва два мешаци, бо би 26. януара мали буц подписани Окремни колективни контракт и спорозуменє синдикатох и Министерства просвити.
Член Предсидательства Униї синдикатох просвитних роботнїкох Сербиї Звонимир Йович гвари же у тим синдикату нє жадаю споминац суми бо, як гварел, нє знаю з чим ше розполага у буджету.
– Нєурядово, роби ше о суми од 13 до 15 000 динари за обидва награди, алє бим нє сцел предвидзовац – гварел Йович, з наглашеньом же ше просвитаре випатра буду мушиц помириц з меншу плацу.