РУСКИ КЕРЕСТУР – У катедралним храме св. Оца Миколая у Руским Керестуре вчера вечар служена традицийна Майсторска Служба Божа за членох керестурского Здруженя ремеселнїкох и приватних поднїмательох и їх фамелиї, а остатнї часи и за шицких роботнїкох.
Службу предводзел парох о. Михайло Малацко, сослужел домашнї капелан и нововербаски парох о. Иґор Вовк, а швичкаре були двоме члени Здруженя.
На Служби було руководство Здруженя, на чолє з предсидательом Владимиром Емейдийом, велї активни и пензионовани члени и члени їх фамелийох.
У пригодней казанї, парох о. Малацко наглашел же ше з тоту Службу дзекує Богу и модлї благослов за роботу керестурских привреднїкох. Вон тиж шицких поволал же би зоз свою роботу нє лєм зарабяли хлєб, алє и жили Євангелию.
Под час модлєня Вируї, майстрове на Служби зоз швичками обиходзели коло олтара и дали свойо прилоги за церкву, цо тиж давна традиция. Служба Божа закончена з панахиду за шицких покойних майстрох и поднїмательох.