НОВИ САД – Вчера, 6. децембра, у Новим Садзе закончени Тринасти Руски фестивал малих сценских формох „Дюра Папгаргаї”, на хторим од 4. децембра виведзени пейсц представи з меншим числом актерох, од два до штири. Фестивал, хтори и у Календаре репрезентативних манифестацийох Националного совиту Руснацох, орґанизую Матка-Дружтво Руснацох Нового Саду-Войводини и Городски одбор Рускей матки Нови Сад.
Всоботу, 5. децембра, на Фестивалє окреме привитана и началнїца Управи за културу Городу Нови Сад Весна Срданов, а як и перши дзень, одбавени два представи.
Всоботу перше наступели млади ґлумици Драмского студия АРТ рускокерестурского Дому култури, у представи „Сезона лову на ловара” Александра Витера, у режиї Владимира Надя Ачима. Була то и премиєра тей представи, у хторей ґлумя Адриана Надь (вецей улоги), Ребека Планчак и Тамара Будински.
Потим виведзена представа „Як забиц предсидателя” Миру Ґаврана, тиж у режиї Владимира Надя Ачима, а у продукциї Руского народного театру „Петро Ризнич Дядя”. Представа витворена у копродукциї з КПД „Карпати” з Вербасу, а ґлумя Янко Лендєр, Юлиян Медєши, Нада Лендєр и Танита Ходак.
Вчера одбавена лєм єдна представа, понеже наявена дуо-драма Драмского студия Шид „Атак на идентитет” нє виведзена, як гварене, пре обєктивни причини, так же Фестивал закончени з представу „Круцина (або курва)” Танкреда Дорста, у режиї Звонимира Павловича, у продукциї Драмского студия Руского културного центру Нови Сад. У представи ґлумя Славко Бучко, Иґор Горняк и Борис Фейди.
През три фестивалски вечари, хтори того року нє бул змагательного характеру, публику з програму упознавали конферансиєре Наташа Макаї Мудрох и Борис Фейди, а на закончуюцим вечаре, Миломир Шайтош у мено орґанизатора позековал вирней публики и виводзачом на провадзеню, односно участвованю на Фестивалє.
Фестивал, у Театралней сали Ґимназиї „Лаза Костич”, отримани з финансийну потримовку Управи за културу Городу Нови Сад, Покраїнского секретарияту за културу и явне информованє и Националного совиту Руснацох.
