РУСКИ КЕРЕСТУР – Вирни парохиї св. оца Миколая вчера у вельким чишлє преславели Квитну нєдзелю – багнїтки, а вельо младих и дзецох ше и висповедали за наиходзаце швето Пасху.
На шицких Службох Божих було вецей вирних як звичайно, а поготов на полдванастовей Служби Божей, церква була полна з дзецми, родичами, младима.
Полдванастову Службу служел капелан о. Владимир Медєши и наказовал о важносци євангелскей подїї наволаней Квитна нєдзеля. Домашнї парох и капелан о. Михайло Малацко и о. Михайло Шанта споведали од 11 годзин, а помогли споведац и старовербаски парох о. Алексей Гудак и кулски капелан о. Платон Салак ЧСВВ.
На утринї священїки пошвецели багнїтки, хтори вирни пред шицкима штирома Службами вжали и однєсли до своїх домох и на теметов на гроби своїх милих.
