БЕОҐРАД – З нєотримованьом перших годзинох у раншей и пополадньовай змени, заняти у просвити сцели обрациц увагу Влади Сербиї же нє сполнює одредби Спорозуменя о ришованю спорних питаньох у просвити, хтори подписани прешлого року.
По податкох синдикатох, у вчерайшим штрайку спозореня участвовали коло 1 000 школи, а спрам спознаньох Рутенпресу, у школох у наших местох дзе порядна настава по руски, штрайк спозореня нє отримани.
Представителє синдикатох образованя СРПС, СОС и ФСПРС „Нєзависносц” гварели же ше на пондзелок маю стретнуц з премиєром Сербиї Александром Вучичом, з котрим буду бешедовац о можлївосцох сполньованя вимогох.
Предсидатель СОС Бранислав Павлович гварел же, окрем же шицки заняти у просвити достали по 7 000 динари, анї єдна точка Спорозуменя нє сполнєта. Кед би ше прилапело вимоги синдикатох, звекшанє у просвити у 2016. року би було 12,5 одсто. Оценєл же вельки проблем будзе и розподзельованє до платних класох и ґрупох, и же зоз Законом о плацох у явним секторе направена „импровизация платних класох”, пре сполньованє обовязки спрам ММФ.
Кед нє буду сполнєти вимоги синдикатох, Брайкович наявел протести по вецей городох Сербиї.