ВЕРБАС – Вчера у просторийох вербаского Дружтва „Карпати” отримана дзевята схадзка Орґанизацийного одбору за Централну преславу Националного швета Руснацох, хтора у януаре будзе у Вербаше, a члени Одбору и на тот завод поинформовали о пририхтованьох за часци програми за хтори су поєдинєчно задлужени.
Вчера порадзене же шицки поволанки на преславу швета буду посилани з єдного места – зоз Заводу за културу Войводянских Руснацох, а Национални совит Руснацох и КПД „Карпати” до Заводу пошлю свойо списки за поволанки.
Сценоґрафия будзе присподобена бини у КПД „Карпати”, дзе после швета и остава, моноґрафия будзе мац коло 150 боки, а на друкованє пойдзе 22. децембра. Як вчера поведзене, материяли за обидва вистави уж у Заводзе, скеч зложени, а порадзене и же после Архиєрейскей Служби будзе мали коктел у просторийох парохиї, дзе будзе и вистава хтора була орґанизована за 150-рочнїцу старовербаскей парохиї.
На Орґанизацийним одборе бешедоване и о часцох самей Шветочней академиї, а з представителями локалней самоуправи порадзене же на дзень швета, 17. януара, окремни автобус цали дзень будзе превожиц нащивительох на локациї програмох.
Орґанизовани и жени котри буду рихтац етно-столи, а на їх жаданє, у рихтаню єдлох за етно-столи буду участвовали и жени з Коцура.
Єдно зоз заключеньох вчерайшей схадзки и же ше шицки заинтересовани за участвованє на турниру у столним тенису на дзень швета, за тото можу приявиц по 10. януар.