НОВЕ ОРАХОВО – У рамикох Дньох Миколи М. Кочиша у новоораховскей Основней школи „18. октобер” вчера отримане стретнуце з писательку и подобову уметнїцу Серафину Макаї и подобовим уметнїком Силвестером Макайом.
За тоту нагоду школяре котри пестую руски язик у ораховскей и у ОШ „Чаки Лайош” у Бачкей Тополї зоз свою наставнїцу Ксению Бенчик пририхтали пригодну програму, а потим им писателька читала свойо стихи, як и гуморески.
На стретнуцу була орґанизована и вистава малюнкох на склу Серафини Макаї, док Силвестер Макаї под час програми мальовал пейзаж, так же дзеци и присутни могли видзиц творенє єдного подобового малюнку, хтори потим подаровани Школи.
У другей часци програми Ирина Папуґова представела нови виданя Дружтва за руски язик литературу и културу.
