НОВИ САД – Шветови дзень добродзечних давательох креви, 14. юний, означени з паролу „Шицких нас повязує крев“. Тогорочна кампаня визначує приповедки людзох чийо животи виратовани дзекуюци трансфузиї креви, же би ше мотивовало дотерашнїх давательох, та порушало других здравих, окреме младих людзох же би давали крев.
З нагоди Дня добродзечних давательох креви предсидатель Здруженя добродзечних давательох креви Нового Саду Стеван Пожеґа гварел же би велї животи були страцени без давательох креви.
– Добродзечни давателє з Войводини прешвечлїво найлєпши у Сербиї. У нас крев дава пейц одсто, а у Беоґрадзе два одсто жительох. За єдно дружтво добродзечни давателє представяю обстоянє и можлївосц за безпечне лїченє гражданох – гварел Пожеґа.
По 2020. рок Шветова здравствена орґанизация од добродзечних давательох жада обезпечиц достаточни количества креви. Нєшка 62 держави маю полни резерви креви од гражданох котри даваю крев без надополнєня и анонимно, а 40 держави ище вше завиша од креви плацених давательох, лєбо од членох фамелиї пациєнтох.