Даниєл Радванї з Вербасу од дзецинства спортиста. Тренирал фодбал и рукомет, алє ше познєйше пренашол у штреляцтве. Почал тренирац 2001. року, и уж петнац роки є активни стрилєц у клубе. Радванї студент права у Новим Садзе и пред трома роками ше почал занїмац з бициґлизмом. Тот спорт му отворел и велї други дзвери.
Роками Даниєл участвовал у кампох дзе пририхтовал талантованих младих стрилцох Сербиї и Войводини, а 2011. року постал и державни шампион зоз серийску воздушну пушку.
– Од 2006. по 2012. рок сом ше опробовал и як тренер, алє и судия у штреляцтве. Судзел сом на националних змаганьох, а од тренерских успихох наймилши ми златна и стриберна медаля на Першенстве Сербиї, хтори освоєли Кристина Бибер и Александра Ковач. Предлужел ше активно змагац, алє вше ридше, бо нє старчи, а без квалитетного тренинґу, гвари, и резултати виоставаю.
Остатнї два златни медалї, поєдинєчно и екипно, освоєл на Спортских бавискох „Яша Баков”, хтори отримани концом октобра у Вербаше.
НА БИЦИҐЛИ БУЛ У ВЕЛЇХ МЕСТОХ
– Року 2012. до мойого животу „вошла” бициґла, и жадал сом на нєй обисц цалу Сербию. Того року сом ше з Вербасу преселєл до Нового Саду, и вшадзи сом гонєл бициґлу, вшелїяк кельо сом могол од обовязкох на студийох. Найчастейше то були траси по Фрушкей гори хтору сом прешол воздлуж и попрейґа – гвари Даниєл хтори упознал велїх новосадских бициґлистох и бул єден з орґанизаторох Новосадскей критичней маси хтора настала як протест бициґлистох хтори глєдали свойо права. Вимагали же би ше их почитовало як ровноправних учашнїкох у транспорту. Нєшка то прекрасни дефиле и друженє бициґлистох каждого остатнього пиятку у мешацу на 17 годзин.
– Сходзиме ше у Лиманским парку, и там маме рижни роботнї, а вец гонїме бициґли през город и то вше по новей драги хтору вибераю сами учашнїки тидзень пред тим. Провадзи нас и полиция, а вше на тей подїї участвую и дзеци на бициґлох, рекреативци, и городски бициґлисти, змагателє, пензионере… Сход ше закончує з традицийним фотоґрафованьом учашнїкох на бициґлох хтори свойо „превозки” подзвигню високо над главу. То своєродни символ Критичней маси, а на концу ше дружиме з музику – толкує наш собешеднїк и додава же му шлїдуюце виволанє – одход на шицки штреляцки змаганя на бициґли. Виволал нам же уж бул у Зренянину, Зомборе, Беоґраду, Панчеву, Смедереву…
ГУМАНИТАРНА ДРАГА ДО ГОЛАНДИЇ
– З векшу кондицию росли и мойо апетити, а добре познате же бициґлисти вше „гладни виволаня”. Влонї сом на бициґли плановал драгу по Европи, а вец ше у маю случели вилїви у нашей жеми. Препровадзел сом тидзень на бентох у Шабцу, Дреновцу, Сримскей Митровици и Моровичу, и праве там ми пришло на розум гуманитарне путованє з цильом позберац помоц людзом хтори пре вилїви барз чежко жили. Таку идею витворел сом зоз Любомиром Михайловичом, алє и з потримовку општини Вербас и Жабель, Дунав осиґураня, фамелийох и приятельох… Удало нам ше пойсц на бициґлох до Амстердаму, (Голандия), и врациц ше до Сербиї – гвари Даниєл хтори теди зоз Михайловичом прешли 41 000 километри. Обишли прекрасни предїли у Европи, и видзели як би требал випатрац бициґлистични транспорт, алє тамтейшим людзом пренєсли свойо упечатки о вилївох у Сербиї.
– Були зме наисце щешлїви кед зме видзели же рушели шлепери помоци зоз Бечу до Сербиї – памета Радванї.
ОРИҐИНАЛНА ИДЕЯ ЗА БИЗНИС
Свой гоби, бициклизем, пред двома роками Даниєл претворел до роботи. Отворел „Цикло випоручованє Нови Сад”, односно курирску службу хтора розвожи пакети лєм на бициґлох.
– Розношиме пакети по Новим Садзе и околних местох, а найдалєй зме випоручовали робу до Беоґраду. На конкурс за штири роботни места курира на бициґли, явели ше 30 особи. У єдним чаше робели 17 курире и мали зме барз розконарену мрежу клиєнтох. Тераз мам трох занятих курирох, а роботни час од рана до вечара – приповеда Даниєл о своєй интересантней роботи. Окрем роботи, вон ше того року одлучел опробовац и у змагательним бициклизме.
– Свидоми сом же досц позно уходзим до того швета, алє сцем ше поровнац зоз найлєпшима бициґлистами у нашей жеми. После 10 обегованьох, видзел сом же бициґлизем екстремно напарти спорт, же го барз любим, и барз ми жаль же сом нє почал скорей тренирац. Участвовал сом на медзинародним обегованю през Войводину, на першенствох и купох Сербиї, а найзначнєйши резултат ми пияте место на Першенстве Сербиї – хронометер (поєдинєчни спринт 30 км) у Ердевику – цеши ше Даниєл хтори после напартих роботних дньох на бициґли и шицких других обовязкох, найволї пойсц на билияр.
– Билияр бавим рекреативно, гоч сом ше и ту змагал на даскелїх аматерских турнирох – приповеда наш собешеднїк о ище єдним своїм интересованю. А його интересованя вимагаю надосц часу, та гвари же „жиє” швидко, и покус и франтує бо, гвари, „геверує” кед слово о любови. Жаль му же пре велї обовязки нє сцигує частейше нащивиц своїх родичох и брата.
– Вше треба мац на розуме же живот кратки, та треба дац шицко од себе и буц щешлїви, алє и дакого зрадовац, бо иншак, задармо жиєме – так закончує нашу розгварку хтошка хто наисце так як роздумує, так и жиє.
ШВИДКЕ, А ТУНЄ
– Муштериї нам виключно правни особи, а на бициґлох робиме лєм швидки „достави”, без чеканя. Без фалшивей скромносци, нєшка можем повесц же зме найшвидша и найтуньша курирска служба у Новим Садзе. А, барз нам мило же тоту нашу роботу окончуєме промовуюци бициґлизем, и очуванє животного штредку – толкує Даниєл мотиви своєй успишней роботи.
