НОВИ САД – Покраїнски секретар за польопривреду, водопривреду и лєсарство Вук Радоєвич у Покраїнскей влади вчера уручел ище 20 контракти о безповратних средствох за набавянє процивкаменцових мрежох за овоцарство. Контракти вредни 73,5 милиони динари, з хторих 28,8 милиони наменєни реґистрованим польопривредним ґаздовством, а 44,7 милиони правним особом.
Дзекуюци и тим безповратним средством з новима процивкаменцовима мрежами у Войводини буду закрити ище 107 гектари под овоцнїками, а у тим року вєдно 360 гектари, гварел покраїнски секретар Радоєвич. Тиж наглашел же Секретарият, тераз у сотруднїцтве з Министерством польопривреди и локалнима самоуправами, и у шлїдуюцим року предлужи з мирами потримовки интензивней польопривредней продукциї и прерабяцкей индустриї.
Безповратни средства за процивкаменцову мрежу, у висини 60 одсто од вредносци инвестициї (без ПДВ) тераз достало и рускокерестурске подприємство „Юарбис”, з хтору буду охранєни 6 гектари под грушку, а контракт вчера подписал директор „Юарбису” Владимир Варґа.