РУСКИ КЕРЕСТУР – Понеже прешлого тижня опрез теметова у Руским Керестуре, у Ризничовей долїни, роздриляна дзива депония, дзе Керестурци руцали рижни одпад, на вчерайшей схадзки Совиту Месней заєднїци (МЗ) порадзене же, пре завоженє долїни, убудуце там годно руцац лєм глїну и будовательни одпад. Як гварел секретар МЗ Михайло Сабадош, одпад роздриляни на инициятиву МЗ, а роботу безплатно окончела локална самоуправа.
На вчерайшей схадзки Совит принєсол Одлуку о звонкасудским намирйованю длуства за кирию за простор МЗ хтори закупец хасновал за предавальню на Вельким шоре, так же го ма виплациц у 10 мешачних ратох.
Совит вчера прилапел задзекованє Владимира Югика на членство у Совиту МЗ, и после писменого приставаня, член Совиту постанє шлїдуюци кандидат хтори на виберанкох достал найвецей гласи.
Бешедоване и о проблему же ше у долїни коло Русинскей улїци, а и у других, зявели лїшки, а пре одредзени законски огранїченя, нє мож их потаманїц. Заключене же ше будзе глєдац совит од ЯП „Завод за вибудов” Кула за ришованє того проблему, а як єдно з ришеньох предложене викерчованє долїнох од наду и їх завоженє.
