Евроинтеґрациї потримує 40 одсто младих, 33 одсто процив

автор ртв
1.2k Опатрене

БЕОҐРАД – Млади у Сербиї у вельким проценту нє потримую уход Сербиї до Европскей униї (ЕУ), вельки процент нє достаточно информовани, а 79,4 одсто младих трима же ше ствари у Сербиї нє одвиваю у добрим напряме – гваря резултати виглєдованя хтори вчера представени на Факултету политичних наукох у Беоґрадзе.

Як указало виглєдованє, аж 33 одсто младих нє потримує евроинтеґрациї Сербиї, 40 одсто потримує, 27 ровнодушни, а указало ше же цо випитанїки старши – векша потримовка уходу Сербиї до ЕУ.

Як главне жридло информацийох о ЕУ млади хасную медиї – телевизию, интернет- новини и интернет-портали.

Лєм 7,8 одсто младих добре информоване о ЕУ, часточнє 42,5 одсто, 21,5 одсто маю барз мало информациї, а коло 3,9 одсто младих гвари же о тим нє маю нїяки информациї.

Виглєдованє указало и же потримовку уходзеню Сербиї до ЕУ даваю млади котри вецей путовали звонка гранїцох Сербиї и котри маю приятельох у ЕУ.

Коло 24 одсто младих ше вияшнєло же би уход Сербиї до ЕУ за нїх бул неґативни упечаток, 47 одсто трима же би з тим Сербия страцела Косово, 32 одсто же би страцела суверенитет у одлучованю, а 14 одсто же би ше погоршала ситуация у Сербиї.

З другого боку, млади думаю же би з уходом до ЕУ найбаржей профитовали млади и политична елита, а найвецей страцели польопривреднїки и тайкуни.

ПОВЯЗАНИ ТЕКСТИ