РУСКИ КЕРЕСТУР – Шнїг и терашня моцнєйша жима дзецом, алє и старшим Керестурцом, оможлївела уживац у популарних жимских розвагох, як цо то санканє и корчолянє. Правда, санканє на правих, вельких санкох, до хторих запрагнути конї уж и на валалє права ридкосц, а як то було дакеди здогадли ше дзепоєдни Керестурци з Маковского шору, кед ше нєдавно повожели на санкох, до хторих конї попрагал познати керестурски любитель коньох Желько Папуґа.
Дзеци, алє и старши, уживаю и на змарзнутей Данчовей долїни, дзе ґрупа Керестурцох рижних ґенерацийох бавя и гокей. Бавячох позберал и терен пририхтал наставнїк физичного Славо Пап, а попри младших, гокей бавя и бувши гокеяше, котри тот спорт у Керестуре тренировали пред 30 роками.
