Забранєне ловиц герлїчки и ярабици

автор бета/зам
1k Опатрене

НОВИ САД – Дружтво за защиту и преучованє птицох Сербиї штредком тижня сообщело же у Сербиї по 31. марец 2017. року забранєни лов на герлїчки, а на ярабици по 31. марец 2016. року, на основи вименкох Правилнїка о ловостою Министерства польопривреди.

З Дружтва за защиту и преучованє птицох здогадую же фаховци вимагали же би ше герлїчку тирвацо висцерало з лїстини ловней дзивини, цо нє сполнєте, алє су задовольни и з тоту забрану.

Шветова уния за защиту природи на найновшу „червену лїстину” птицох урядово положело и герлїчку, як загрожену у Европи.

Коалиция нєвладових орґанизацийох „Звук птицох” вимагала же би ше, попри за герлїчки и ярабици, принєсло ловостой и за препилки, понеже їх число остатнї децениї опадло пре криволов и шверц забитих птицох.

Ловно-туристични аґенциї виражели нєзадовольство зоз спомнутима забранами, а ловаре нєурядово гваря же ярабици и препилки вше загроженши и од вельких польопривредних машинох, насампредз косачкох и комбайнох.

 

ПОВЯЗАНИ ТЕКСТИ