Завитни дзень з церковнима достойнїками на одпустовим паломнїцтве у Водици

автор маф
1.3k Опатрене

РУСКИ КЕРЕСТУР – У Марийовим святилищу Водици у Руским Керестуре вчера, на Завитни дзень, на Треци дзень Русадльох, була велька шветочносц – одпустове паломнїцтво цалого Апостолского еґзархату за грекокатолїкох у Сербиї з нагоди Ювилейного Року милосердия, шветочне преглашенє духовней повязаносци Водици з папску базилику св. Мариї Велькей у Риме, цо историйна подїя, и отверанє ювилею хтори будзе нарок – означованя 200-рочнїци перших указаньох у Водици (1817-2017). Источашнє, апостолски еґзарх за грекокатолїкох у Сербиї, владика Георгий Джуджар означел 15-рочнїцу пошвецаня за владику.

Архиєрейску Службу Божу на 11 годзин предводзел апостолски нунций, архиепископ Лучияно Сурияни з нашим владиком Георгийом, а сослужели секретар апостолскей нунциятури монсиньор Янош Блаковяк, суботицки бискуп Янош Пензеш, сримски бискуп Дюро Ґашпарович, владика Нил Лущак з Ужгороду (Україна), владика Милан Лах з Прешова (Словацка), апостолски администратор з Нїредьгази (Мадярска) монс. Авел Сочко, а познєйше ше придружел и архиепископ и митрополит беоґрадски Станислав Хочевар.

З владиками сослужели 24-ме свяшенїки з нашого Апостолского еґзархату, Прешовскей архиепископиї, Крижевского владичества, та пейцме священїки латинского обряду зоз сушедних местох. На початку Служби виронаучни дзеци по италиянски привитали нунция Сурияни и придали му квеце, як и нашому владикови Георгийови, винчуюци му його ювилей.

На Служби присуствовали и представителє державних орґанох – помоцнїк директора Канцелариї за одношеня з церквами и вирскима заєднїцами Марко Николич, зоз сотруднїком Ґаврилом Ґрбаном, як и чолнїки Националного совиту Руснацох и Националного совиту Українцох у Сербиї, та представителє явного, дружтвеного и културного живота рускей заєднїци.

Часци Служби Божей шпивал и домашнї Хор Дому култури и Катедралней церкви св. о. Миколая, под дириґенством Лидиї Пашо, а пред и под час Служби споведали по штирме священїки.

Шицких присутних на початку Служби привитал Владика Георгий, наказовал папски нунций Сурияни, а преклад його бешеди читани по руски, українски и по сербски. Нунций визначел важносц швета и тей значней подїї за Водицу.

После пречитаного преглашеня Водици за тирваце духовне повязованє з папску базилику св. Мариї Велькей, Служба закончена з многолїтствиями, а на концу шицки владикове мировали числених вирних.

Паломнїкох и Керестурцох у Водици вчера було наисце барз вельо – зоз скоро шицких наших парохийох, як и з руских местох у Горватскей, котри пришли орґанизовано на автобусох, лєбо на власних превозкох, зоз своїма священїками.

ПОВЯЗАНИ ТЕКСТИ