НОВИ САД – У обєкту „Пальчочка” Предшколскей установи (ПУ) „Радосне дзецинство” у Новим Садзе воспитачка Александра Колбас вчера отримала закончуюцу годзину руского язика у тим школским року.
Дзецом котри на єшень почню ходзиц до школи – Кристини Ковач, Владимирови Папуґа, Майди Айдукович и Надї Горняк, заступнїца Дружтва за руски язик, литературу и културу Ирина Папуґа уручела припознанє „Славка Сабадош”. Дзеци на дарунок достали и виданє Дружтва – кнїжку „Пупча” Янка Фейсу.
З тей нагоди Папуґова гварела же ше тоти годзини руского язика отримує як часц проєкту „Учиме ше по руски” и же з ПУ „Радосне дзецинство” подписани контракт по хторим од септембра сиґурно знова у тей ПУ буду отримовани годзини руского язика.
У тим школским року у групи було 28-еро дзеци, штверо з нїх на єшень почню ходзиц до школи, а годзини були каждей стреди на 18 годзин.