БЕОҐРАД – После явней кампанї процив Нарису закона о польопривредней жеми оглашела ше и министерка польопривреди Снежана Боґосавлєвич Бошкович, котра виявела же тот закон нє предвидзує предаванє жеми странцом, алє парастом.
По Спорозуменю о стабилизациї и придружованю з 2008. року предвидзене же од 1. септембра 2017. року годно предавац жем странцом, а Бошковичова гварела же ше роби на прекладаню того термину.
Нарис закона предвидзує и можлївосц правним особом же би жем под аренду вжали на 30 роки. У тим ше, як гварела министерка за РТС, руководзели з тим же би ше на лицитованє дало 250 000 гектари обрабяцей жеми, з вєдно 800 000 кельо єст у Сербиї.
– Понеже ше вельку часц жеми нє обрабя, предложели зме же би ше часц – найвецей 30 одсто, понукло вельким инвеститором – гварела Бошковичова.
З Министерства гварене же ше почитує Закон о реституциї, та шицко цо предмет реституциї – нє будзе предаване. Координатор Мрежи за реституцию Миле Антич оценєл же ше попонагляло з вименками Закона о польопривредней жеми, та же вони подрозумюю одщипйованє польопривредней державней жеми.
– Думаме же у державней власносци єст найменєй 700 000 гектари, алє вони скрити, без основи су уписани як дружтвена, задружна та и приватна власносц – визначел Антич.