РУСКИ КЕРЕСТУР – З нагоди Националного швета Руснацох вчера вечар у керестурским Доме култури отримана програма и друженє, на хторим присуствовали представителє Националного совиту Руснацох, локалней самоуправи, керестурских институцийох, установох здруженьох, та гражданє Руского Керестура.
Програму отворел Мишани хор Дома култури з гимну Републики Сербиї „Боже правде”, а потим и шветочну шпиванку Руснацох у Сербиї „Браца Русини”. Ивана Дудаш пречитала писню Ирини Гарди Ковачевич „Нашлїдство”, хтора указує на значносц очуваня традициї и обичайох, а Михайло Зазуляк есей др Якова Кишюгаса о розвою и напредованю руского народу од часу приселєня з Карпатох, та по нєшка.
Предсидатель Националного совиту Славко Рац привитал шицких присутних, повинчовал швето Руснацох и наглашел же мултинационалносц и мултикултуралносц Войводини то єдно з найвекших єй богатствох, же треба же бизме були горди на тото же зме Руснаци и преношели то на свойо дзеци.
– Жадам вам поручиц же бизме у тих чежких часох нє страцели дух и виру. Верим же тота материялна криза прейдзе, алє ше будзе чежше витаргац з духовней кризи, кед ше єй препущиме. Прето важне отримовац културни манифестациї, хасновац шицки права хтори нам дати, прето же нє будземе знац кельо то значи покля то нє страциме – гварел Рац.
У мено локалней самоуправи Керестурцом швето повинчовала предсидателька Скупштини општини Кула Снежана Мркаич. Вона визначела же рижнородносц народох и културох у општини, алє и у Войводини добра прето же учиме буц толерантни, учиме мац власни идентитет, а заш лєм жиц у рамикох дружтва, односно держави хторей припадаме.
Коктел з нагоди швета пририхтало Здруженє женох „Байка”.
На Замку, дзе Канцелария НС Руснацох, на Школи „Петро Кузмяк”, Доме култури, опрез Месней заєднїци, односно школско-спортскей гали и на ЯКП „Руском” повикладани застави Сербиї и Руснацох у Сербиї.
