БАЧКИ ПЕТРОВЕЦ – На пондзелок, 29. авґуста, у Бачким Петровцу будзе отримана заєднїцка схадзка руского и словацкого Активу наставнїкох, зоз цильом чераня искуства у роботи обидвох активох. Стретнуце руских основних и штреднїх школох у сотруднїцтве зоз Активом наставнїкох руского язика, 22. по шоре, находзи ше у Програми роботи Дружтва за руски язик, литературу и културу за 2016. рок.
Сход орґанизує Национални совит словацкей националней меншини вєдно зоз Асоцияцию словацких педаґоґох и Активом професорох руского язика, а у рамикох стретнуца будзе отримани Округли стол на тему Положенє мацеринского язика националних меншинох у Войводини. Заключеня буду послати до Министерства просвити, науки и технолоґийного розвою и Координациї националних совитох националних меншинох же би ше на тот способ злєпшало роботу професорох и звекшало интересованє школярох за ученє мацеринского язика.
Окрем професорох словацкого и руского язика, на схадзку поволани и професоре и студенти зоз оддзелєньох за руски и словацки язик Филозофского факултету у Новим Садзе.
Заєднїцка схадзка будзе отримана у просторийох Основней школи „Ян Чаяк” на 10 годзин, а потим будзе орґанизована нащива Ґимназиї зоз домом школярох „Ян Колар” и Ґалериї Зузки Медведьовей, як и заєднїцки полудзенок.
Заинтересовани треба же би ше приявели по 26. авґуст на имейл: papugai@mts.rs, лєбо на телефон 064 19 75 281.