БЕОҐРАД – Збирки за пририхтованє закончуюцого испиту хтори школяре осмей класи покладаю на концу основней школи, у предаваню буду од пондзелку, 19. януара, медзи нїма и по руски. Збирки з мацеринского язика видруковани на седем язикох националних меншинох – по албански, болгарски, мадярски, румунски, руски, словацки и по горватски.
Збирки обявели Завод за вреднованє квалитету образованя и воспитаня и „Просвитни прегляд” и годно их набавиц у кнїжкарньох „Просвитного прегляду”, Заводу за учебнїки, „Службеного глашнїку”, у кнїжкарскей мрежи ширцом Сербиї, лєбо их мож поручиц прейґ школи.
Три публикациї зоз сербского (мацеринско) язика, математики и комбинованого тесту вєдно коштаю 600 динари, а поєдинєчно – за сербски (мацерински) язик 270 динари, за математику 170, а за комбиновани тест 160 динари.
Кнїжки маю по 450 задатки базовани на образовних стандардох, подзелєни на три уровнї посцигнуцох – основни, штреднї и напредни и оможлївюю осмаком же би самостойно вежбали и преверели знанє, алє и же би ше упознали з моделами по хторих ше прави задатки за испит. На концу публикациї єст и ришеня задаткох – сообщене зоз Заводу за вреднованє квалитету образованя и воспитаня.