НОВИ САД – Покраїнска власц би у наступних двох мешацох з роботи мала одпущиц 243 занятих на нєодредзени час, по Одлуки о максималним чишлє занятих у явних службох, пише новосадски портал 021. Тота цифра ше одноши лєм на занятих на нєодредзени час, а нє и на тих цо робя на одредзени час, лєбо на поставени и вибрани особи.
По службених податкох з конца децембра прешлого року у шицких орґанох, явних службох и подприємствох у Покраїни єст 5 434 занятих – стаємно 4 839, а на одредзени час 323. Меновани особи єст 137, а поставени 135. По Одлуки о максималним чишлє занятих у явних службох, на нєодредзени час можу буц заняти 4 596, цо значи же звишок 243 особи.
Медзитим, по спомнутей одлуки єст надосц роботни места хтори по систематизациї одредзени, а нє пополнєти су, цо Покраїни охабя простору же би, док их одпущує, примала нових роботнїкох. Поведзме, у институциї Покраїнского омбудсману єст 19 занятих на нєодредзени час, а предвидзени 20, у Управи за капитални укладаня єст 66, а може буц занята 71 особа, у Секретарияту за образованє заняти 84, а по систематизациї треба 91, док у ресору култури тераз роби 41 особа, а можу 43.
Найвекше зменшанє занятих би мало буц у Служби Скупштини АПВ – зоз 71 на 63; у Секретарияту за польопривреду з 50 на 44; у Секретарияту за науку з 25 на 21, алє у векшини орґанох число роботнїкох на нєодредзени час одвитує терашньому числу занятих.