ВЕРБАС – З нагоди означованя 45-рочнїци Здруженя подобових уметнїкох Вербасу, прешлого викенду у Вербаше отримана „Колония отворених дзверох” на хторей участвовали коло 50 уметнїки з Вербасу и городох у реґиону.
Од пиятка по нєдзелю, у Ґалериї Културного центру настали вецей дзешатки малюнки и други уметнїцки роботи а, як визначела предсидателька Здруженя Тамара Барановски, основна идея була же би ше през творчосц и креативну енерґию збогацело културни случованя у городзе.
Шицки роботи хтори настали на Колониї власносц Здруженя и будзе ше их хасновац за представянє уметнїкох и самого дружтва, алє и за виставу тих роботох початком идуцого року.
Орґанизованє „Колониї отворених дзверох” помогли АД „Сава Ковачевич” и СПД „Каиро”, а потримовку дали Културни центер и Ґалерия Културного центру.