НОВИ САД – У ПУ „Радосне дзецинство”, оддзелєню „Палчочка”, стреду, 9. марца, наймладши дзеци вєдно з воспитачку Александру Колбас участвовали у роботнї – правеню зомбулькох. Паперове квеце будзе дарунок мацером место програми хтора того року нє отримана пре розлични возрост дзецох (у наймладшей ґрупи их єст найвецей), а и прето же дзеци праве таку активносц найволя.
Колбасова роби з дзецми од новембра прешлого року, а до „Палчочки” уписани 28 дзеци чийо родичи пристали же би їх дзеци приходзели на годзини пестованя руского язика, т. є. на друженє и бависко хторе орґанизоване каждей стреди на шейсц годзин вечар.
Ирина Папуґа, спред Дружтва за руски язик и литературу и културу, гвари же од тей єшенї з управу ПУ „Радосне дзецинство” подписани контракт – проєкт „Учиме по руски” (учимо русински) хтора своєродна тирвацша обовязка медзи Дружтвом и ПУ „Радосне дзецинство”, односно Установи спрам виховательки хтора роби з нашима дзецми.
