КУЛА/РУСКИ КЕРЕСТУР – За порадну роботу Месней заєднїци Руски Керестур у буджету Општини Кула за 2016. рок предвидзени 6 милиони 50 000 динари, як и два милиони 300 000 пренєшени средства з того року, алє ту нє ураховани и пенєж зоз самодоприносу, понеже є у буджету приказани вєдно з другима самодоприносами у местох општини.
Зоз средствох Општини Кула и керестурского самодоприносу, а прейґ ЯП „Завод за вибудов” Кула, у 2016. року предвидзене ушоренє центру Керестура, за цо наменєни 4 милиони 860 000 динари, а за вибудов драги до хотара вєдно опредзелєни 4 милиони 300 000 динари.
За реконструованє пияцу у Керестуре у буджету наменєни 600 000, а за кладзенє ошвиценя на фодбалским стадионє „Яраш” 240 000 динари.
За Основну школу „Петро Кузмяк” у идуцим року з буджету Општини Кула наменєни 7 милиони 470 000, а за Ґимназию 6 милиони 380 000 динари.
За Дом култури Руски Керестур у буджету Општини Кула плановани 9 милиони 394 000 динари, дзе ураховани и средства з других жридлох, насампредз за програмни проєкти, хтори плановани на милион 340 000 динари.
Општина Кула и нарок сполнї законску обовязку финансованя националних заєднїцох котрих єст найменєй 10 одсто у структури жительства, так же по 250 000 динари опредзелєни за активносци националних совитох Руснацох, Мадярох и Чарногорцох.