РУСКИ КЕРЕСТУР – У Основней и штреднєй школи зоз домом школярох „Петро Кузмяк” у Руским Керестуре вчера, 1. септембра, бул перши наставни дзень у наступаюцим школским року.
Директорка Школи Хелена Пашо Павлович у школским голу привитала наймладших школярох першей класи Основней школи хторих у двох оддзелєньох єст 43-йо, а хтори наставу буду мац у школским будинку Замок.
Окреме привитани школяре першей класи Ґимназиї дзе у оддзелєню по руски будзе 13, а у оддзелєню по сербски 25 школярох, а на напряму Туристични технїчар 29 школярох. Шицких других школярох у своїх учальньох привитали оддзелєнски старшинове и подзелєли им розпорядок годзинох.
