КУЛА – У предвиберанковей цихосци, пияток, 22. априла отримана остатня схадзка Скупштини општини Кула у тим зволаню, цо потолковане з наглу потребу приношеня ребалансу буджету Општини, насампредз пре вибудов трафо-станїци на индустрийней зони у Кули. З ребалансом за тоту намену дополнююцо буду видвоєни 27 милиони динари.
У вименєним буджету општини за тот рок опредзелєни и 3 милиони 600 000 динари за виробок проєктно-технїчней документациї за вибудов фабрики води за Руски Керестур и Крущич.
Медзи иншим, одборнїки на пиятковей схадзки прилапели и вименки и дополнєня Статуту Дому култури Руски Керестур, Одлуку о комуналних дїялносцох, Финансийни план Дому здравя за прешли рок, Одлуку о анґажованю екстерней ревизиї за прешлорочни општински буджет, одлуки вязани за програми дїлованя явних подприємтвох, як и дзепоєдни кадрово одлуки.