БАЧКИ ПЕТРОВЕЦ – Пондзелок, 29. авґуста, у Бачким Петровцу у Основней школи „Ян Чаяк” отримана заєднїцка схадзка руского и словацкого Активу наставнїкох. У першей часци схадзки, медзи другима, и Ирина Папуґа представела роботу Дружтва за руски язик, литературу и културу и його Активу, а потим бул Округли стол на тему „Положенє мацеринского язика националних меншинох у Войводини”.
Светлана Золнян, координаторка Одбора за образованє, ше зложела же и попри тим же ше роками роби на тим же би ситуация у образованю меншинских заєднїцох була вельо лєпша, ситуация вше чежша. Проблеми вецейнїсти, а на сходзе ше найвецей бешедовало о виборней настави и о тим цо зробиц же би мацерински язики меншинских заєднїцох мали лєпши статус.
На хтору адресу треба пойсц и на котри дзвери задуркац кед слово о проблемох хтори спомнути, бешедовала и Олена Папуґа, посланїца у Народней скупштини Републики Сербиї и предложела же би ше направело тези цо ше точно глєда од держави, од ресорного Министерства, и предложела же можебуц тераз прави час, кед ше отвераю одредзени поглавя, же би ше цошка конкретнєйше и зробело.
Мелания Римар, предсидателька Одбору за образованє Националного совиту Руснацох, медзи иншим спозорела же на початку школского року школяре ознова буду анкетовани, и же ту треба буц будни и видзиц чи тоти анкети запровадзени, кельо маме дзеци, и як ришиц проблем роботи наставнїцох кед дзецох нєт досц.
Заключеня зоз Округлого стола тих дньох би мали буц положени на папер и прешлїдзени до Министерства просвити, науки и технолоґийного розвою и Координациї националних совитох националних меншинох, т. є. вшадзи там дзе постої шанса же би тоти хтори одлучую ришели велї нєришени питаня.
Сход орґанизовал Национални совит словацкей националней меншини вєдно зоз Асоцияцию словацких педаґоґох и Активом професорох руского язика. После схадзки рисутни нащивели Ґимназию у Бачким Петровцу зоз домом школярох „Ян Колар” и Ґалерию Зузки Медведьовей.
