РУСКИ КЕРЕСТУР – На основи финансийного плану прилапеного концом прешлого тижня на схадзки Совиту Месней заєднїци Руски Керестур, за инвестицийни роботи у Керестуре зоз самодоприносу плановани коло 12 и пол милиони, а з Општини Кула 4 милиони 200 000 динари.
За асфалтованє драги у месце предвидзени 2, а за драгу до хотара 4 милиони динари, дзе за проєктованє драги 300 000. За ушоренє яркох и одводзенє атмосферскей канализациї предвидзени 1,4 милиони, дзе и 420 000 динари за за пререзованє драгох и кладзенє пайпох, односно ушоренє мосцикох.
За ушоренє центру Керестура опредзелєни 4,5 милиони динари, а за проєктну документацию за тоту роботу предвидзени 360 000 динари.
За оправянє закрица на месней Здравственей амбуланти предвидзени 706 000 динари, 600 000 за ушоренє пияцу, 444 000 за виробок проєктней документациї и за явне ошвиценє, а за кладзенє рефлекторох на фодбалски стадион на Ярашу наменєни 240 000 динари.
Попри инвестицийних роботох, Програма самодоприносу будзе витворйована и з дотациями – за образованє у тим року наменєни 133 000, за Фестивал рускей култури „Червена ружа” 400 000, за спорт 667 000, а за Фонд солидарносци 240 000 динари.
Дотациї за медийне и туристичне представянє Керестура буду 240 000, а здруженьом гражданох опредзелєни 260 000 динари. Дотациї за спорт, Фонд солидарносци, медийне представянє и за здруженя буду опредзелєни на основи конкурсох.