НОВИ САД – Дружтво писательох Войводини (ДПВ) принєсло одлуки о тогорочних наградох, так же награду за кнїжку рока достанє поета Неделько Терзич за наслов „Глад и гледај”, за преклад рока наградзена Зденка Валент-Белич, за преклад зоз словацкого романа Павела Ранкова „Збуло ше першого септембра (лєбо даєден други дзень)”, а награду ДПВ „Мирослав Стрибер” достанє Ирина Гарди Ковачевич, за кнїжку „Нєбо над Керестуром”.
Як поведзене у толкованю награди, кнїжка приповедкох и леґендох „Нєбо над Керестуром”, у виданю НВУ „Руске слово”, облапя 31-ну приповедку о збуваньох з конца 19. и початку 20. вику и жири окреме обраца увагу на конципованосц кнїжки и факт же Гарди Ковачевичова перше виробела попис чудесних фантастичних зявеньох при Руснацох, спатраюци ше на майстра славянского приповеданя – Ґоґоля.
– У тим списку валаских чудох з хторих виткани приповедки Ирини Гарди Ковачевич зявює ше и чарни тащок и закутна баба, котра ма неґативни маґийни функциї. Жири трима же кнїжка значно доприноши упознаваню културних представох и вредносцох рускей заєднїци – стої у обгрунтованю за додзельованє Награди „Мирослав Стрибер” ДПВ Ирини Гарди Ковачевич.
Шицки награди добитнїком буду уручени на порядней Скупштини ДПВ 27. априла.
