Искра – одлична, Русин и Бачка – барз добри

автор апал
1.4k Опатрене

Змаганя у єшеньскей часци фодбалского першенства закончени. У подручних фодбалских лиґох Зомбор и Нови Сад одбавени петнац кола, а у подручней лиґи Бачка Тополя, дзевец. Коцурска Искра у своєй лиґи змаганя закончела на першим месце, а Русин и Бачка у своїх подручних лиґох (Зомбор и Нови Сад) маю барз добри пласман – на шестим месце.

Коцурска Искра од самого початку бавела добре цо на концу дало и добри резултат. Но, задовольство бавячох и управи Клуба лєм часточне.

У остатнїм колє єшеньскей часци сезони у Медзиопштинскей фодбалскей лиґи Бачка Тополя–Мали Идьош–Вербас–Бечей, коцурска Искра бавела дерби змаганє у Змаєве процив Обилича. Резултат бул нєришени 2:2, а Искра до 70. минути водзела зоз 2:0. Гоч на концу змаганя, резултат бул добри за Искров пласман у лиґи, бавяче з терену пошли нєзадовольни, понеже побида була так блїзко, а бависко закончене нєришено.

РЕОРҐАНИЗАЦИЯ ЛИҐИ

Пременки хтори направени пред початком єшеньскей часци першенства Коцурцом нє барз одвитую, а могло би повесц же нє принєсли очековани злєпшаня.

– Реорґанизация лиґи у хторей ше змага Искра, подруче Бачка Тополя, дискутабилна насампредз прето же думаня подзелєни. Думам же єдине цо добре же зменшана километража за одход на змаганя. Число клубох менше, у лиґи єст лєм дзешец клуби, а на тим подручу екипи нє принєсли очековани квалитет. То тиж мож повесц и кед слово о судзеню. Вельо є слабше и то углавним за клуби хтори нє зоз Фодбалского союзу Бачка Тополя. Но, наздавам ше же то тераз лєм початок и же ше дацо пременї и же ше ище вецей шицки адаптуєме на нови обставини – гварел Здравко Бабич тренер екипи ФК „Искра”.

На початку першенствених змаганьох Искра мала у планє буц при верху таблїчки, бо з початку змаганя бавели без пейцох стандардних першотимцох. У першим колу страцели од екипи зоз Томиславцох.

– У тим першим змаганю було шицкого лєм нє фодбалу. Судзенє було катастрофалне. Алє, од того змаганя та по конєц тей полсезони, шицки змаганя  Искра одбавела барз добре и ефикасно цо на концу дало резултат же зме на першим месце. Кед ше шицко поздава, твердзим же зме найквалитетнєйша екипа у тим дружтве, та прето тераз маме и векши амбициї, а то висши ранґ змаганя у Суботицкей лиґи. Вельке доприношенє тому успиху дала и нова управа Клуба на чолє зоз предсидательом Сталевичом – гварел тренер Здравко Бабич.

Искра одбавела дзевец змаганя, шейсц победзела, два бевела нєришено, а єдно страцела. Ґол-розлика тиж прешвечлїво найлєпша у лиґи, плус 29, понеже бавяче Искри дали 38, а прияла 9 ґоли. З другима словами, на каждим з маганю було вецей як штири ґоли. За екипу бавели седемнац стандардни бавяче.

 – У ярнєй часци першенства до борби за перше место на таблїчки ше уключа екипи Обилича и Войводини хтори од нас маю єден, односно три боди менєй. Но, вони приходза бавиц до Коцура, цо олєгчує бо бавиме на домашнїм терену и шицко завиши од нас и нашого бависка на терену.  Вшелїяк рахуєм и на добри бависка Дамяна Ґубаша, Дрлячи, Ваяґича и Малацка хтори бавели на шицких змаганьох, як и на Сердара, Дамира Ґубаша, Ступара, Николича… По квалитету бависка видвоюєм Дамяна Ґубаша бо цалу сезону одбавел одлично, и сиґурно є найлєпши бавяч у лиґи. З длужним почитованьом шицким бавячом екипи хтори зоз своїм бависком заслужели перше место на таблїчки –  гварел тренер Здравко Бабич.

И ПОДРОСТОК ШЕ НЄДА

У Змаєве свойо змаганя успишно бавели коцурски когуцики, младши и старши пионире. Коцурски когуцики победзели зоз резултатом 2:0, а ґоли дали Дарко Салонтаї и Матия Паунович. Младши пионире победзели зоз резултатом 6:0, а ґоли дали Милорад Ваяґич 3, Марио Нешич, Алекса Дорокхази и Оґнєн Салонтаї по єден ґол.

Старши пионире тиж победзели зоз резултатом 4:0, а ґоли дали Ненад Шанта 2, Данило Мезеї и Давид Гарди дали по єден ґол.

ДОБРИ ПЛАСМАН БАЧКЕЙ

У остатнїм колє єшеньскей часци першенства у Новосадскей лиґи, у дербию сушедох дюрдьовска Бачка зоз 3:0 победзела Милетич з Мошорину. З тим резултатом, Бачка полусезону закончела на 6. месце. На таблїчки першопласовани Борац зоз Шайкашу зоз 42 бодами, други Пролетер з Баноштору зоз 30 бодами, кельо ма и трецопласовани Юґович зоз Катю, штварте место з бодом менєй забера ТСК з Темерину, пияте ОФК „Футоґ” з 27 бодами.

– Кед слово о новей, реорґанизованей лиґи у хторей ше змага дюрдьовска Бачка, нїч ше вельо нє пременєло. Нови екипи зоз хторима бавиме по квалитету нє одскакую вельо од нас. У технїчним смислу шицко, так повесц, исте. Єдино же маме длугши путованя. Ми у тактики нїч нє пременєли, бо хто сце буц перши муши победзиц на шицких змаганьох, а наш императив на терену дац максимум и посцигнуц максимум. Обачел сом же терени на хторих бавиме горши як були. Зоз резултатом хтори зме посцигли у єшеньскей часци сом задовольни – гварел Ґоран Андєлкович тренер ФК „Бачка 1923”.

Як надпомнул мала розлика у бодох медзи Бачку и першу и другу екипу на таблїчки, лєм 4–5 боди. Так же очиглядне же екипа ма амбициї освоїц висши пласман у ярнєй часци.

– Затераз нє маме вельо понукнуца за пременку составу екипи. Може ше случиц же приведземе нових бавячох, алє ище вше то лєм нависценя. Екипа хтору маме, компактна и добра. Нє могол бим видвоїц нїкого як найлєпшого. Шицки добре бавели, а цо найважнєйше бавя тимски. Найвецей ґоли дал Мича Тривунович – 7, алє мушим надпомнуц же на пол змаганьох у єшеньскей часци першенства нє бавел. То ище єден факт хтори указує о яким тиму слово. Кед буду бавиц як по тераз, будзем задовольни – гварел на концу тренер Ґоран Андєлкович.

У ярнєй часи сезони перше змаганє Бачкей будзе з єденастопласованим ОФК „Сириґ”.

ФК „Бачка“

ФК „Бачка“

НОВА ЛИҐА – НОВИ СПОКУСИ

И Русин у остатнїм колу єшеньскей часци першенства, у дерби змаганю процив екипи ФК „Гайдук юниор” зоз Кули, заслужено освоєл три боди. Но, з початку першенства русиновци нє указали добри бависка. Подли старт мож приписац початней нєубавеносци, можебуц и велькей жажди за побиду. Насампредз прето же екипа добре бавела, алє по резултатох то нє потвердзовала. У першим змаганю страцели од екипи Крила Країни, у другим од Славиї зоз Пиньвиц, а вец  бавела нєришено зоз екипу ЖАК зоз Зомбора, цо бул перши бод. Добра бавяцка форма и резултати аж потим почали сциговац.

– ФК „Русин” ше у новей сезони змагал у новей лиґи дзе бавели и екипи зоз подруча Бачкей Паланки. Як зме и обчековали лиґа була квалитетнєйша и озбильнєйша.  Екипа Русина ше у лєтним периодзе и помоцнєла, та ше обчековало и добри резултати. На самим початку Русиновей екипи нє ишло шицко найлєпше. У перших штирох колох екипа освоєла лєм 1 бод цо ше наисце нє очековало.  Аж у пиятим колу Русин зазначел першу побиду, цо подзвигло екипу. Русин направел серию 9 змаганя без пораженя,  та и позиция на таблїчки була вельо лєпша. На концу єшеньскей часци Русин дзелї 5. и 6. место зоз освоєнима 25 бодами, цо добри резултат. Зоз дакус лєпшим стартом екипа Русина ше могла найсц и медзи першима трома екипами, алє и так витворени циль зоз початку сезони,  а то же би Русин бул у сиґурней зони,  а нє же би наяр мушел роздумовац о борби за оставанє у тей лиґи – гварел Борис Шайтош, член Управи Русина.

Зоз уходом до того ранґу змаганя настали и даяки пременки у орґанизациї змаганя, зявели ше нови екипи зоз хторима Русин по тераз нє бавел цо за пременку и мотивацию добре. Зявели ше и нови судийове зоз подручу Бачкей Паланки, хтори мали вельо оштрейши критериюми як цо то були у подручу дзе ше змагали потераз. Дзепоєдни екипи ше на тоти пременки чежко привикли, алє Русин ше прилагодзел и випочитовал шицки новосци. Уведзени и векши кари за нєспортске справованє як за бавячох, так и за сам Клуб.

– Нова лиґа вецей вимага цо ше дотика финансийох, почим судийски такси висши, плаци ше високу котизацию,  а уведзени и кари за достате векше число жовтих картонох. Русинов циль, у предлуженю першенства,  затримац ше у тей лиґи и то у горнєй часци таблїчки и пробовац у наиходзацим периодзе стабилизовац финансиї понеже постої  реална можлївосци же ше нє вигласа месни самодопринос, цо вельо зменша приходи ФК “Русин” – наглашел Борис Шайтош.

Обєктивно спатрене, посцигнути резултати наших фодбалских клубох очековани и добри. Екипом преостава вихасновац жимску паузу, назберац нову моц и наяр ша указац у ище лєпшим видaню.

РЕЗУЛТАТИ ФК „РУСИНА” ТЕЙ ЄШЕНЇ

Русин од 15 змаганьох ма 7 побиди, 4 змаганя бавел нєришено, а 4 змаганя страцел.

Змаганя цо их Русин страцел, страцени на початку – три, а остатнє страцене змаганє страцене на концу полусезони у Бачким Петровцу котри перши на таблїчки на концу єшеньскей полусезони котри ма лєм два нєришени змаганя, а гевто друге побиди.

Ґолґетере Русина були: Дюканович 6, Б. Орос 5, Я. Кулич 4, Будински 3… Русин у полусезони достал 38 жовти картони и 2 червени.

ФК „Русин“

ФК „Русин“

ПОВЯЗАНИ ТЕКСТИ