РУСКИ КЕРЕСТУР – Пре спреведацу и нєстабилну хвилю и спомалшену ламачку, у Руским Керестуре єшеньска шатва жита найвироятнейше будзе закончена концом новембра.
У Керестуре продукцию жита контрача подприємства „Юарбис”, „Аґрохома” и „Аґрокерестур”, чийо представителє, на основи количества предатого нашеня, алє и комуникациї з парастами, оценєли же нарок у керестурским хотаре будзе менєй поверхносци под житом.
Менєй жита годно буц и пре прекрочени термин шатви, а як гварел Славко Малацко Сачи з подприємства „Аґрохома”, поцагованє термину шатви вимага и векше количество нашеня, понеже менши шанси же би ше прияло.
– Жито хторе позно пошате крегке, та кед будзе оштра и суха жима годно вимарзнуц. На другим боку, добре кед будзе шнїгу, бо би на жито дїйствовал як „покровец” и защита – гварел Малацко.