СЕРБИЯ – Гоч на схадзки представительох польопривреднїкох и Влади Сербиї отриманей штредком мешаца Влада, медзи иншим, пристала на вимогу же би забранєла увоз млєка, меса и їх преробкох зоз жемох Европскей униї (ЕУ), то нє будзе сполнєте. Министерка польопривреди Снежана Боґосавлєвич Бошкович вчера гварела же нє будзе уведзена забрана увоженя млєка, алє же проблем звишку будзе пошвидко ришени, а нєодлуга почнє и одкупйованє швиньох.
Министерка гварела же Републична дирекция за робни резерви од продуковательох млєко одкупи за резерви млєка у праху и на тот способ будзе ришени проблем звишку млєка. Тераз польопривреднїки годни предавац млєко до млєкарньох, а кондитором обезбечене робиц под истима условиями як и у ЕУ, та тота часц индустриї нє будзе загрожена, гварела Боґосавлєвичова.
З тим остатнїм поцагом Влади, односно Министерства польопривреди, з часци сполнєти вимоги польопривреднїкох котри штрайковали, вимагаюци же би Републични робни резерви купели звишок швиньох за 185 динари по килограму (з ПДВ), интервентне одкупйованє млєка и забрану увоженя меса и продуктох з меса, млєка и млєчних продуктох до конца рока.