БЕОҐРАД – З нагоди освойованя одличного штвартого места на нєдавно отриманим 31. Европским змаганю з транспорту у Ческей, за репрезентацию Сербиї – школярох основней школи – подпредсидателька Влади Сербиї и министерка за будовательство, транспорт и инфраструктуру Зорана Михайлович вчера орґанизовала окремни приєм, на хторим були и членїца спомнутей репрезентациї Леонела Цифрич з Руского Керестура и єй наставнїк Зденко Шомодї.
Як Рутенпрес дознава од Шомодїя, министерка Зорана Михайлович школяром подзековала на тим же достоїнствено представяли свою жем на Европским змаганю и уручела им пригодни дарунки.
По приєму отримана и конференция за медиї, на хторей подпредсидателька Влади похвалела школярох и повинчовала им на посцигнутим успиху.
После шветочносци у Министерстве, члени Репрезентациї Сербиї у транспорту – Никола Йович з Нишу, Миляна Веселинович з Нишкей Банї, Петар Лукич зоз Сримскей Митровици и Леонела Цифрич з Керестура, у Беоґрадзе нащивели Теслов музей, а у Доме за дзеци без родительского стараня отримали и преподаванє о безпечносци у транспорту.