РУСКИ КЕРЕСТУР – Як то узвичаєне на концу єдного рока, Совит Месней заєднїци (МЗ) Руски Керестур вчера отримал Шветочну преширену схадзку, тераз у Доме борцох и пензионерох, на хторей, попри членох Совиту, присуствовали и представителє векшини керестурских здруженьох, установох и институцийох, дзепоєдних подприємствох, та дзепоєдни привреднїки.
Предсидатель Совиту МЗ Владимир Олеаяр присутних здогаднул же после нєпоштредних виберанкох штредком того року пришло до змени Совиту, потим и у Служби МЗ, алє наглашел же и терашнї Совит, вєдно з другима структурами у месце, роби и будзе робиц на хасен Руского Керестура. Олеяр, як и о.д. секретара МЗ Юлиян Медєши, бешедовали и о инвестицийох з месного самодоприносу планованих идуцого року у валалє, хтори би з ребалансом у марцу мали войсц до општинского буджету, як то по нових законских предписаньох.
Гоч схадзка була шветочна, праве о нових правилох финансованя прейґ проєктох з буджету општини присутни поставяли найвецей питаня, о чим зоз здруженями будзе радзене по шветох. Тиж так, понеже наглашене же и надалєй треба робиц на доходзеню до канализациї, та здравей води за пице, односно фабрики води, тиж винєшени и вецей идеї за одредзени роботи, на концу схадзки предложене же би ше о шицких предкладаньох пошвидко бешедовало и на окремним Зборе гражданох у орґанизациї МЗ.
На схадзки присуствовали коло 35 особи, котри накратко винєсли звити о роботи своїх орґанизацийох и здруженьох у тим року, а вецейраз наглашене же коло 20 активни здруженя представяю вельке богатство Керестура и указую на активносц Керестурцох у рижних обласцох. Тиж визначене же цо вецей средства треба обезпечовац прейґ конкурованя до висших инстанцох, насампредз прейґ конкурсох секретариятох АП Войводини.
О роботи своїх здруженьох и установох у тим року на Шветочней схадзки Совиту МЗ вчера бешедовали предсидателька Еколоґийного руху „Желєни персцень” др Леона Доротич Ґутеша, о.д. директора Школи „Петро Кузмяк” Хелена Пашо Павлович, парох керестурски о. Михайло Малацко, предсидатель Здруженя пензионерох Владимир Югик, предсидатель Спортского дружтва „Русин” Драґан Ковачевич, а швета присутним повинчовал и предсидатель Вивершного одбору Националного совиту Руснацох Желько Ковач.
О поробеним у прешлим року тиж бешедовали Мария Дорошки, спред Секциї Дружтва за руски язик, литературу и културу, предсидатель Здруженя ремеселнїкох и приватних поднїмательох Владимир Емейди, предсидатель Здруженя рибарох „Коляк” Янко Джуджар, предсидателька Здруженя женох „Байка” Славица Катона, предсидатель Рускей матки Дюра Папуґа, Елемир Рац спред месней орґанизациї Союзу Руснацох Українцох Сербиї, директор ЯКП „Руском” Иґор Фейди, предсидатель Здруженя паприґарох Владимир Варґа, предсидатель Здруженя ловарох „Ярабица” Михал Надь, координатор парохийного Каритасу Янко Катона, та Станиша Маринкович, спред оддзелєня полицийней станїци у Керестуре. Шицки бешеднїки Керестурцом пожадали и успишни 2015. рок.
