И о Руснацох на Отвореним дню у Европским парламенту

автор зам
921 Опатрене

НОВИ САД/БРИСЕЛ – У Бриселу вчера почала манифестация Европски тидзень городох и реґийох „Отворени днї 2015” („Оpen Days 2015 Brussels”), хтори орґанизує Директорат за реґионалну политику Европскей комисиї и Комитет реґионох. На манифестациї по 15. октобер участвує и делеґация Покраїнскей влади, на чолє з єй предсидательом Бояном Пайтичом, а на Округлим столє з назву „Розумиц Войводину”, хтори нєшка, 13. октобра орґанизує Европски парламент, буду представени и традицийни национални меншини з Войводини чий язик у службеним хаснованю, медзи нїма и Руснаци.

Вєдно з Покраїнским секретариятом за културу и явне информованє, ношителє того представяня и шейсц професийни установи култури – Завод за културу Войводини и заводи за културу войводянских Мадярох, Словацох, Руснацох, Румунох и Горватох.

Мултикултуралносц Войводини на Округлим столє перше будзе представена прейґ кратшого промотивного филму (у продукциї РТВ Войводини), а потим и прейґ представяня спомнутих заводох за културу, медзи нїма и нашого.

Тиж так, на ютре, 14. октобра, у Мисиї Републики Сербиї при Европскей униї у Бриселу будзе Дзень Войводини, на хторим, попри проєкциї спомнутого филму, будзе орґанизована и вистава на хторей буду виложени публикациї и други докуметни заводох за културу, медзи нїма и Руснацох, хтори презентую мултикултурални скарб Войводини.

На отвераню вистави буду бешедовац Боян Пайтич, посланїк у Европским парламенту Кнут Флекенштайн и покраїнски секретар за културу и явне информованє Славиша Ґруїч.

Делеґация Покраїнскей влади ше вчера у Бриселу стретла и зоз шефицу Оддзелєня за Сербию Европскей комисиї, а главна тема тогорочних, тринастих „Отворених дзверох 2015” то „Европски реґиони и городи – партнере за инвестициї и економски рост”, хтора подзелєна до трох тематских цалосцох.

 У рамикох представяня Войводини у Бриселу буду представени и Руснаци

У рамикох представяня Войводини у Бриселу буду представени и Руснаци

ПОВЯЗАНИ ТЕКСТИ