РУСКИ КЕРЕСТУР – Прешлей нєдзелї, 20. марца, у керестурскей Школи Петро Кузмак отримане општинске змаганє зоз историї за школярох основних школох од 5. по 8. класу котре уж роками наймасовнєйше, а того року участвовали вецей як 80 школяре зоз шицких местох општини Кула.
Зоз домашнєй школи єдини котри виборел пласман на окружне змаганє зоз шестей класи и завжал друге место то Иван Фейди, а участвовали и Андрей Провчи и Максим Катона.
Змагали ше и школяре зоз пиятей класи София Симунович и Мартин Рац, як и зоз седмей класи Ребека Сабадош и Аня Ґовля, а зоз осмей класи Емина Бики и Анита Чизмар.
Шицки школяре котри ше змагали пред тим посцигли найлєпши успихи на школским змаганю.
Орґанизаторе змаганя, спред домашнєй Школи, после роботней часци вихасновали нагоду же би присутним госцом представели и штредньошколски напрями туристично-готелиєрского технїчара и ґимназиї, насампредз школяром седмих и осмих класох, а потим и младшим.