ЧЕРВИНКА/КРУЩИЧ – У Червинки пияток, 3. априла, почала 47. Зонска смотра театралней творчосци, а у Крущичу нєшка почина Општинска смотра дзецинскей театралней творчосци.
На Зонскей смотри у Червинки змагаю ше осем аматерски представи, аж шейсц з местох кулскей општини – з Червинки, Руского Керестура, Крущичу, Сивцу и два з Кули, та по єдна представа з Вербасу и Жаблю.
Всоботу, 4. априла, на Зонскей смотри у Червинки наступели млади ґлумци з Драмского студия „АРТ” керестурского Дому култури, з представу „Врацим ше по вашо души” Стивена Кинґа, у адаптациї и режиї Владимира Надя Ачима. Зонска смотра у Червинки будзе закончена на соботу, 11. априла.
На Општинскей смотри дзецинскей театралней творчосци у Крущичу нєшка и ютре буду виведзени 8 дзецински представи з местох кулскей општини, медзи нїма и два по руски – „Маче, любим це як цо качка люби каче” Роберта Такарича, у режиї Александри Лендєр, а у виводзеню дзецох з Руского КУД „Др Гавриїл Костельник” з Кули и представа „Як настали бридки слова” Душка Радовича”, у режиї Ксениї Бодянец, а у виводзеню дзецинскей ґрупи Драмского стуидя „АРТ” Дому култури Руски Керестур.
Дзеци з Кули на Општинскей смотри наступаю нєшка, а з Керестура на ютре.
